Jeremi profetaren liburutik 33, 14-16.
Hau dio Jaunak :
Huna heldu direla egunak,
Izraelen etxeari eta Judaren etxeari eman zorion agintza
beteko baitut.
Egun heietan, garai hartan,
legezko muskila sortaraziko diot Dabidi,
eta zuzenbidea eta justizia ezarriko ditu lurrean.
Egun heietan, Juda salbatuko da
eta Jerusaleme lasai biziko.
Huna herriari emanen diotan izena : “ Jauna gure zuzentasuna”.
Jaunak errana.
Eskerrak zuri Jauna.
24. Salmoa
Zu ganat daukat nere arima, Jainko Jauna !
Zure bideak erakuts, Jauna, otoi, neri,
Emazu ere xendren berri.
Zure egia igor zadazu aitzindari,
Dena bainago beti zuri.
Ona da ona eta zuzena Jainko Jauna :
Harek xuxentzen makur dena.
Apalak ditu zuzen zuzenik joanarazten,
Beren bidean ibil diten.
Haren bidean egia eta amodio,
Hari josiak bagitzaio.
Hari daudenak ditu Jainkoak adiskide,
Agertzen da maiz heien alde.
Jondoni Paulok Tezalonikarreri 1a : 3, 12 – 4, 2.
Haurrideak,
Jaunak egin dezala gero eta handiago
zuek elkarrentzat eta denentzat duzuen maitasuna,
guk zuentzat dugun maitasuna handia den bezala.
Horrela indarrez bete ditzala zuen bihotzak,
saindu eta estakururik gabe izan zaitezten
Jainko gure Aitaren aitzinean,
Jesus gure Jauna bere sainduekin etorriko den egunean.
Gainerakoan, haurrideak, otoi eta otoi
hau eskatzen dautzuegu Jesus Jaunaren izenean :
gureganik ikasi duzue nola bizi Jainkoari atsegin emaiteko,
eta hola egiten duzue ;
hobeki egizue oraino.
Badakizue nolako irakaspenak eman dauzkitzuegun
Jesus Jaunaren izenean.
Jaunak errana.
Eskerrak zuri Jauna.
Alleluia, alleluia.
Ager betiko bihotz ona,
Salbamendua igor, Jauna.
Jesu Kristoren Ebanjelioa san Luken liburutik 21, 25-28. 34-36.
Jesus bere etortzeaz mintzo zitzaioten bere dizipulueri.
“ Seinaleak izanen dira iguzkian, ilargian eta izarretan ;
lurrean, berriz, nazioneak laztuko dira,
itsasoaren orroak eta uhainen indarrak zoraturik.
Jendea hatsik gabe geldituko da ikaraz,
munduari gainerat heldu zaionaren beha,
zeruetako indarrak kordokatuko baitira.
Orduan, Gizonaren Semea hodeian etortzen ikusiko dute,
ahal eta aintza handitan.
Horiek guziak gertatzen hastean,altxa zaitezte eta goiti burua,
hurbiltzen ari baita zuen erospena.
Kasu egizue,bada ! Ez utz moteltzera zuen bihotzak
hordikerian, mozkorkerian eta biziko griñetan,
egun hura ustegabean gainerat eror ez dakizuen.
Sarea bezala eroriko da munduan bizi diren guzien gainerat.
Beraz, egon erne eta egin otoitz ordu oroz,
gertatu behar diren horieri guzieri ihes egin ahal diezaiezuen
eta xutik egon ahal zaitezten Gizonaren Semearen aitzinean.”
Jaunak errana.
Eskerrak zuri Jauna.
(Andiazabal, “Mezetako deiak”, C urtea – sail berria)
Haurrideak,gauden erne otoitzean, gizon guziak Jaunaren aintzinean agertzeko gai izan ditezen.
1. Mundu guzian barreiatuak diren gure haurride girixtinoentzat, gizonen artean, Jaunaren beha daudenak izan gaiten, egin dezagun otoitz.
2. Gogo oneko gizonentzat, zerbaiten beha daudenentzat eta etsimendutan direnentzat, Jaunak esperantzazko solasak adiaraz ditzoten, egin dezagun otoitz.
3. Bertzen jujatzeko kargua dutenentzat, eta beren haurrideen laguntzeko hautatuak diren abokatentzat, egin dezagun otoitz.
4. Guhaurentzat, Izpiritu Sainduak eman diezagun indar, bakearen eta zuzentasunaren alde lan egiteko, egin dezagun otoitz.
Zuzentasuna eta Egia ziren Jainkoa, entzun gure otoitza, guk galdatzen ez dakiguna ere emanez,
Jesu Kristo gure Jaunaren bitartez.
Parropia bakotxak egokitu behar du
